এজাক বৰষুণতে উটুৱাই নিলে মহানাগৰিকৰ আভিজাত্য। স্মাৰ্ট চিটিৰ পৰিৱৰ্তে বানপানী জৰ্জৰ মহানগৰীলৈ পৰিণত হৈছে গুৱাহাটী। নেৰানেপেৰা বৰষুণৰ ফলত শুকুৰবাৰে গুৱাহাটীৰ কেইবাটাও ঠাইত পানী জমা হোৱাৰ ফলত স্তদ্ধ হৈ পৰে বাট-পথ, যাতায়াত ব্যৱস্থা।
যাৰফলত হাতীগাওঁ, বেলতলা, চান্দমাৰী, চিৰিয়াখানা পথ আৰু অন্যান্য অঞ্চলত সমস্যাই দেখা দিছে। অফিচ, বিদ্যালয়-কলেজ অথবা অন্যান্য কামত ওলাই আহি কৃত্ৰিম বানৰ বাবে ৰাজপথতে ঘণ্টা-ঘণ্টা জুৰি আৱদ্ধ হৈ ৰ’ল জনসাধাৰণ।
উল্লেখ্য যে, ভাৰতীয় বতৰ বিজ্ঞান বিভাগে (আইএমডি) গুৱাহাটীত বজ্ৰপাত আৰু ৩১মিমি (১.২২”) তীব্ৰ বৰষুণৰ ভৱিষ্যতবাণী কৰিছে। ইফালে, শুকুৰবাৰে (১৩/০৫/২০২২) ১.০০ বজাত গুৱাহাটীৰ শ্ৰীমন্ত শংকৰদেৱ আন্তঃৰাষ্ট্ৰীয় প্ৰেক্ষাগৃহত কাউঞ্চিলৰ সাধাৰণ নিৰ্বাচনৰ পিছত গুৱাহাটী পৌৰ নিগমৰ প্ৰথমখন বৈঠক অনুষ্ঠিত হয়।
