পদূলিমুখত হেঁপাহৰ ভোগালী বিহু। চেনেহৰ ভোগালীক আদৰিবলৈ ৰাজ্যজুৰি ব্যাপক উৎসাহ -উদ্দীপনা৷ ব্যস্ততাৰ যেন অন্ত নাই গাঁৱৰ জীয়ৰী-বোৱাৰীৰ মাজত৷ পিঠা-পনাৰ প্ৰস্তুতিৰ বাবে আখলত বাঢ়িছে ব্যস্ততা। গাঁৱৰ ডেকা-বুঢ়া একত্ৰিত হৈ আটক ধুনীয়াকৈ সাজি উলিয়াইছে ভেলাঘৰ৷ ৰাজ্যৰ ভিন্ন প্ৰান্তৰ লগতে বকোত ভোগালীক আদৰিবলৈ পূৰ্ণ প্ৰস্তুতি চলাইছে ৰাইজে৷
ৰাজ্যৰ বিভিন্ন প্ৰান্তৰ লগতে বকোৰ গাধপুতা গাওঁত ৰাজহুৱাভাৱে ভোগালী বিহু উদযাপনৰ বাবে দিনে-নিশাই প্ৰস্তুতিত লাগিছে স্থানীয় ৰাইজে৷ গাওঁখনৰ ৰাইজে সন্মিলিত প্ৰচেষ্টাৰে উৰুকাৰ নিশা আনন্দ স্ফুৰ্তিৰে একেলগে এসাঁজ খোৱাৰ উদ্দেশ্যে সাজি উলিয়াইছে এক বিশেষ আৰ্হিৰ ভেলাঘৰ ৷ সাতামপুৰুষীয়া পৰম্পৰা অক্ষুণ্ণ ৰাখি গাঁৱৰ ডেকা-গাভৰু, পুৰুষ-মহিলা সকলো ব্যস্ত ভেলাঘৰ বনোৱাত। বাৰিৰ বাঁহ আৰু পথাৰৰ নৰাৰে গাঁওখনত নিৰ্মাণ কৰি উলিয়াইছে তাজমহল আৰ্হিত এটা ভেলাঘৰ।
বকোৰ বৃহৎ আকাৰৰ তাজমহলে এতিয়া ৰাইজৰ দৃষ্টি আকৰ্ষণ কৰিবলৈও সক্ষম হৈছে । সুদৃশ্যমান বিশালকায় তাজমহল সাঁজি উলিয়াবলৈ বিগত এটা পষেকজুৰি গাঁওখনত চলিছিল এক যুদ্ধকালীন প্ৰস্তুতি। উৰুকাৰ নিশা এই ভেলাঘৰতে গাঁওবাসীয়ে লগে ভাগে খাব ভোজৰ এসাজ।
