হেঁপাহৰ ৰঙালী বিহুলৈ মাজত মাত্ৰ কেইটামান দিন। বিহুক লৈ সকলোতে আৰম্ভ হৈছে প্ৰস্তুতি। কিন্তু বিহুৰ প্ৰস্তুতিৰ মাজতে ৰাজ্যৰ ভিন্ন প্ৰান্তত অহা ধুমুহা- বৰষুণে সেমেকাই তুলিছে বিহুৰ আনন্দ উল্লাহ। কিছু কিছু ঠাইত ধুমুহা-বৰষুণ আৰু কিছু কিছু ঠাইত শিলা-বৃষ্টিয়ে তচনচ কৰিছে বহুতো অঞ্চল।
আজি দিনৰ ভাগত ডবকাত হঠাৎ ধুমুহাৰ তাণ্ডৱ ৰূপ। বৃহত্তৰ অঞ্চলত ধুমুহাই তচনচ কৰিলে গছ–গছনি। চলন্ত গাড়ীত উভালি পৰিল প্ৰকাণ্ড গছ। কথমপি প্ৰাণৰক্ষা গাড়ীখনৰ যাত্ৰীৰ।ডবকাৰ দীঘল জাৰুনী গাঁৱতো বিস্তৰ ক্ষতি। একেদিনাই গোগামুখতো হঠাতে ধুমুহা আৰু শিলাবৃষ্টি। গোগামুখৰ বিভিন্ন স্থানত বিধ্বংসী ধুমুহা। ধুমুহা-শিলাবৃষ্টিৰ ফলত ব্যাপক ক্ষয়-ক্ষতি। সমগ্ৰ গোগামুখ অঞ্চলত ব্যাহত বিদ্যুৎ সেৱা। লগতে প্ৰচণ্ড ধুমুহাই কোবাই গ’ল ডিব্ৰুগড় জিলাৰ মৰাণৰ বিভিন্ন অঞ্চল। মৰাণৰ খোবাং, দাঁতিকাষৰীয়া অঞ্চলতো প্ৰবল ধুমুহা।
উল্লেখ্য যে উজনিৰ পৰা নামনিলৈ এতিয়া সকলোতে কেৱল দেখা গৈছে বতৰৰ তাণ্ডৱ ৰূপ।
