বিদ্যুতৰ বিলৰ পৰা ৰেহাই পাব দেশবাসীয়ে, প্ৰধানমন্ত্ৰী নৰেন্দ্ৰ মোদীৰ বৃহৎ ঘোষণা……
১ কোটি ঘৰত ছাদৰ ওপৰত সৌৰশক্তি স্থাপনৰ লক্ষ্যৰে আমাৰ চৰকাৰে ‘প্ৰধানমন্ত্ৰী সূৰ্য্যোদয় যোজনা’ আৰম্ভ কৰিব।”
সোমবাৰে (২২ জানুৱাৰী) প্ৰধানমন্ত্ৰী মোদীয়ে ঘোষণা কৰে ‘প্ৰধানমন্ত্ৰী সূৰ্য্যোদয় যোজনা’।এই আঁচনিখনৰ অধীনত দেশৰ এক কোটি পৰিয়ালে ছাদৰ ওপৰত সৌৰশক্তি ব্যৱস্থা লাভ কৰিব।
ছাদৰ ওপৰত সৌৰশক্তি ব্যৱস্থা স্থাপনৰ প্ৰচাৰৰ বাবে এইটো প্ৰথম আঁচনি নহয় যদিও ২০১৪ চনত চৰকাৰে ছাদৰ ওপৰত সৌৰ কাৰ্যসূচী আৰম্ভ কৰে যাৰ লক্ষ্য আছিল ২০২২ চনৰ ভিতৰত ৪০,০০০ মেগাৱাট (MW)ৰ সঞ্চিত স্থাপন ক্ষমতা লাভ কৰা।
অৱশ্যে এই লক্ষ্যত বিফল হ’ল কেন্দ্ৰীয় চৰকাৰ৷ ফলত চৰকাৰে ২০২২ চনৰ পৰা ২০২৬ চনলৈ সময়সীমা বৃদ্ধি কৰিলে। আজি প্ৰধানমন্ত্ৰীয়ে অযোধ্যাৰ ৰাম মন্দিৰ প্ৰাণ প্ৰতিষ্ঠাৰ প্ৰাক ক্ষণত সূৰ্য্যোদয় যোজনাৰ ওপৰত কয় যে, মূলতঃ ই এনে এক আঁচনি য’ত আৱাসিক গ্ৰাহকৰ বাবে ছাদত সৌৰশক্তিৰ ব্যৱস্থা স্থাপন কৰা হ’ব।
সামাজিক মাধ্যম এক্সৰ জৰিয়তে তেওঁ কয় যে, ‘আজি অযোধ্যাৰ জীৱন পবিত্ৰতাৰ শুভ উপলক্ষে মোৰ সংকল্প আৰু অধিক শক্তিশালী হৈছে। ভাৰতৰ জনসাধাৰণৰ ঘৰৰ চাদত নিজাকৈ সৌৰ শক্তিৰ ব্যৱস্থা থাকিব লাগে। অযোধ্যাৰ পৰা উভতি অহাৰ পিছত মই লোৱা প্ৰথম সিদ্ধান্তটো হ’ল ১ কোটি ঘৰত ছাদৰ ওপৰত সৌৰশক্তি স্থাপনৰ লক্ষ্যৰে আমাৰ চৰকাৰে ‘প্ৰধানমন্ত্ৰী সূৰ্য্যোদয় যোজনা’ আৰম্ভ কৰিব।”
তেওঁ লগতে কয় যে এই আঁচনিখনে কেৱল “দৰিদ্ৰ আৰু মধ্যবিত্ত শ্ৰেণী”ৰ বিদ্যুৎ বিল হ্ৰাস কৰাই নহয়, শক্তি খণ্ডত স্বাৱলম্বী হোৱাৰ ভাৰতৰ লক্ষ্যকো অধিক ত্বৰান্বিত কৰিব।
