কাজিৰঙা বনাঞ্চলত ঠায়ে ঠায়ে ভৰিছে পানী, বৰষুণৰ পানীত বুৰ গৈছে বনাঞ্চলৰ ভিন্ন অঞ্চল

কাজিৰঙা বনাঞ্চলত ঠায়ে ঠায়ে ভৰিছে পানী। বৰষুণৰ পানীত বুৰ গৈছে বনাঞ্চলৰ ভিন্ন অঞ্চল। বাট-পথ বন্ধ হৈ পৰাত নাৱেৰে বনকৰ্মীৰ টহল। কঁহৰা, আৰিমৰা, কাৰাশিং আদি জলমগ্ন।নিৰাপদ স্থানত আশ্ৰয় বন্য জীব-জন্তুৰ।

নেৰানেপেৰা বৰষুনৰ ফলত পানীৰে উপচি পৰিছে কাজিৰঙা ৰাষ্ট্ৰীয় উদ্যানৰ জলাশয় ৷ অৱশ্যে ব্ৰহ্মপুত্ৰৰ বাঢ়নী পানী এতিয়ালৈ সোমোৱা নাই ৰাষ্ট্ৰীয় উদ্যানখনত৷ ডিফলু নদীৰ পানীয়েও জলমগ্ন কৰিছে কাজিৰঙাৰ ভিন্ন অঞ্চল৷ ৰাষ্ট্ৰীয় উদ্যানখনৰ পথৰ ওপৰত পানী জমা হোৱাৰ বাবে যোগাযোগ বিচ্ছিন্ন হোৱাৰ উপক্ৰম৷ কঁহৰা বনাঞ্চলৰ আৰিমৰা, হোলালপাথ, কাৰাশিং আদি অঞ্চলত ভৰিছে পানী৷ ৰাষ্ট্ৰীয় উদ্যানখনৰ বুঢ়াপাহাৰ বনাঞ্চলত হাতীৰ কেম্প আদিকে ধৰি পথসমূহত পানীৰে উপচি পৰাত বনকৰ্মীয়ে নাও লৈ বনাঞ্চলৰ সুৰক্ষাত নিয়োজিত হ’বলগীয়া হৈছে৷ অৱশ্যে বৰ্তমান সময়লৈ বনাঞ্চলৰ ওখ স্থানসমূহত অৱস্থান কৰিছে বনৰীয়া জীৱ–জন্তু৷