ATMত কাৰ্ড ভৰালে টকা নহয়, ওলাব ৰেচন
আপুনি হয়তো বেংকৰ এটিএম প্ৰায়ে ব্যৱহাৰ কৰে৷ প্ৰয়োজন অনুসৰি ধনো উলিয়াই এটিএমৰ পৰা৷ কিন্ত কেতিয়াবা শুনিছেনে এটিএমৰ পৰা চাউল-ঘেঁহু ওলোৱা কথা৷ এতিয়া সেইয়া সম্ভৱ।
এটিএম কাৰ্ড নহয়, স্মাৰ্ট ৰেচন কাৰ্ড ব্যবহাৰ কৰি মেচিনৰ পৰা উলিয়াব পৰা যাব চাউল, গোম, ঘেঁহু ইত্যাদি৷ যাৰ নাম দিয়া হৈছে অন্ন এটিএম৷ দেশৰ এখন ৰাজ্যত স্থাপন কৰা হৈছে এই অন্ন এটিএম৷
World Food Programeৰ অধীনত প্ৰধানমন্ত্ৰী দৰিদ্ৰ কল্যাণ বিনামূলীয়া ৰেচন আঁচনিৰ জৰিয়তে দেশত নিৰ্মাণ কৰা হৈছে প্ৰথমটো অন্ন এটিএম মেচিন৷
এতিয়াৰ পৰা হিতাধিকাৰীসকলে সূলভ মূল্যৰ দোকানত শাৰি পাতিব নালাগে৷ একেদৰে ৰেচন কমকৈ পোৱাৰ অভিযোগো দিব নালাগে৷ অন্ন এটিএমত স্মাৰ্ট ৰেচন কাৰ্ডৰ জৰিয়তে ক্লিক কৰিলেই ১মিনিটতে এটিএমৰ পৰা ওলাই আহিব নিৰ্ধাৰিত পৰিমাণৰ চাউল আৰু ঘেঁহু৷
প্ৰধানমন্ত্ৰী দৰিদ্ৰ কল্যাণ বিনামূলীয়া ৰেচন আঁচনিৰ জৰিয়তে কেন্দ্ৰই দৰিদ্ৰ সীমাৰেখাৰ তলৰ লোকসকলক প্ৰতিমাহে ৫ কিলোগ্ৰামকৈ ঘেঁহু, চাউল আৰু বাজৰা দিয়াৰ ব্যৱস্থা কৰিছে৷ হাৰিয়ানা চৰকাৰে জনবিতৰণ প্ৰণালীৰ জৰিয়তে দেশত পোন প্ৰথমবাৰৰ বাবে PDSৰ আসোঁৱাহ দূৰ কৰিবলৈ গুৰগ্ৰামৰ ফৰেখ নগৰৰ সূলভ মূল্যৰ দোকান এখনত স্থাপন কৰিছে অন্ন এটিএম মেচিন৷ এইটো ৰাজ্যখনৰ প্ৰথমটো পাইলট প্ৰজেক্ট হিচাপে বিবেচিত হৈছে৷
অন্ন এটিএম মেচিনটো নিয়ন্ত্ৰণ কৰিবৰ বাবে লাগে দুজন ব্যক্তি৷ মেচিনৰ পিছফালে আছে ৰেচনৰ সুকীয়া চেম্বাৰ৷ সময়ে সময়ে চেম্বাৰত ভৰাব লাগে ৰেচন৷ এই মেচিনটো নিৰ্মিত হৈছে Make in india মিচনৰ জৰিয়তে। এটিএম মেচিনটো আধুনিক ভাৰতৰ অন্যতম পৰিচয় হিচাপে চিহ্নিত হৈছে৷
