বন্দুকৰ নলীৰে আফগানিস্তানৰ ক্ষমতা দখল কৰা তালিবানে দেশৰ ক্রিকেটত দিব সমৰ্থন।
ক্রিকেটত কোনোধৰণৰ হস্তক্ষেপ নকৰাৰ আশ্বাস তালিবানৰ৷ জাতীয় ক্রিকেট দলৰ একাংশ সদস্যৰে হোৱা বৈঠকত এই প্রতিশ্রুতি দিয়ে তালিবান ৰাজনৈতিক কার্যালয়ৰ বিষয়ববীয়াই৷
তালিবানে আফগানিস্তান দখল কৰাৰ পিছতে দেশখনৰ জনসাধাৰণৰ লগতে ক্রিকেটলৈও অন্ধকাৰ ভৱিষ্যৎ নামি আহিছিল৷
আফগানিস্তান ক্রিকেট দলটোৱে পাকিস্তানৰ বিপক্ষে খেলিবলগীয়া আগন্তুক এদিনীয়া শৃংখলাটোক লৈও অনিশ্চয়তা আহি পৰিছিল যদিও তালিবানৰ ৰাজনৈতিক কার্যালয়ৰ বিষয়ববীয়াই স্পষ্ট কৰি দিয়ে যে আফগানিস্তান ক্রিকেটক তেওঁলোকে সমর্থন দি যাব৷
এক সাক্ষাৎকালত আনাছ হাক্কানিয়ে কয় যে, তালিবানে দেশখনৰ জাতীয় ক্রিকেট দলটো আৰু খেলুৱৈসকলৰ সমস্যা সন্দর্ভত অচিৰেই কার্যব্যৱস্থা গ্রহণ কৰিব আৰু তালিবানে দেশৰ ক্রিকেটক সদায়েই সমর্থন দি যাব৷
