নিউয়ৰ্কত বানপানী, বানে প্ৰাণ কাঢ়িলে ৪৮জন নাগৰিকৰ

হঠাতে অহা বিধ্বংসী বানে ধুই নিলে নিউয়ৰ্ক। মুষলধাৰ বৰষুণে উটুৱালে ঘৰ-দুৱাৰ। বানপানীয়ে নিউয়ৰ্ক, নিউ জাৰ্ছী, পেনিনছোলা আৰু কানেক্টিকাটৰ বহু লোকৰ ঘৰ ধ্বংস কৰে।

বৃহস্পতিবাৰে, নিউয়ৰ্কত ঘূৰ্ণী বতাহ হাৰিকেন IDAই প্ৰাণ কাঢ়িলে ৪৮ জন নাগৰিকৰ। ঘূৰ্ণী বতাহৰ লগতে হোৱা প্ৰচণ্ড বৰষুণৰ বাবে, নিউয়ৰ্কত হঠাৎ বৃদ্ধি পায় জলস্তৰ। বানে সংহাৰী ৰূপ ধাৰণ কৰে নিউয়ৰ্কত। বানৰ ফলত হঠাতে সাগৰসদৃশ পৰিৱেশলৈ ৰূপান্তৰ হয় নিউয়ৰ্কৰ বাট-পথ।

এই বিধ্বংসী প্ৰাকৃতিক দুৰ্যোগৰ মুখামুখি হোৱা নাগৰিকে জীৱনকালত এনেধৰণৰ দুৰ্যোগৰ সন্মুখীন নোহোৱাৰ কথা উল্লেখ কৰে।

বৃহস্পতিবাৰে আবেলি পেনিনছোলাৰ ৩৮,০০০ ঘৰ, নিউ জাৰ্ছীত ২৪,০০০টা আৰু নিউয়ৰ্কত ১২,০০০টা ঘৰত কৰ্তন হয় বিদ্যুৎ সংযোগ। ধুমুহাৰ বাবে নিউয়ৰ্কত বাতিল কৰা হৈছে শতাধিক বিমান। স্তব্ধ হৈ পৰিছে বিমানসেৱা। অৱশ্যে এতিয়াও নিউয়ৰ্কত অব্যাহত আছে উদ্ধাৰ অভিযান।